29 Oct 09~天朗第二個interview

29 Oct 09~天朗第二個interview

尋日,下午又帶左天朗去in K1,呢間係最近屋企的幼稚園,不過純粹諗住俾阿仔拎下經驗,因為我同爸爸都希望天朗可以入讀基督教背景的幼稚園,所以我地最希望天朗入讀的係聽日(31/10)將會in的一間!!

講番尋日先,阿仔呢期的情緒真係好唔穩定呢,話說,換好衫,準備出門口時,佢竟然唔肯走.話要婆婆一齊去,但係婆婆要留o係屋企睇住細佬嘛!! 於是,我只好強行抱佢出門口,雖然係好近,但好彩我都預早左好多時間出門口,所以,跟住先夠時間俾我,去平伏佢的心情!!

先係帶佢落樓下遊樂場,點知,佢依然大哭大叫,話要番屋企搵婆婆...佢唔肯玩...算..跟住我就帶佢去左屋企對面7仔,諗住買枝益力多,哄下佢,令佢收聲,唔好再喊...開頭佢都唔係好肯...好彩跟住慢慢佢都開始平伏了,"唔記得"左搵婆婆了!! 然後,我就同佢慢慢行去間幼稚園,仲有d時間,就同佢o係學校門口個遊樂場玩一陣,令佢放鬆下心情...點知,攪笑位o黎啦...我地一踏入個遊樂場,就有位太太問我: 你係咪深圳o黎架,定係呢邊架? 我只係輕輕答左佢一句:唔係呀! 跟住就冇理佢了!! well....家下我個樣好大陸咩,定係佢地覺得間幼稚園只係for 佢地架呢...哈哈....anyway...呢間始終都唔係我地心儀的學校,所以算吧!

講番阿仔的interview啦,時間差唔多,我地就入去啦,先係o係個課室交表,等面試,枱面放左d玩具俾阿仔玩,佢玩左一陣,就叫佢個名,入去in了....去左另一個課室,坐低之後,老師問我天朗識唔識講野,我話佢識!! 跟住老師問佢叫咩名? 佢好細聲咁答:天朗! 然後就俾左木玩具,上面有幾塊積木,老師叫佢逐塊拎出黎,拎哂出黎之後,就逐塊逐塊俾佢,叫佢match番落去塊板度, 阿仔好叻呀...全部o岩哂!! 之後拎左條香蕉出黎,問佢係咩黎o既? 哈...佢明明識架,不過佢唔出聲,咁老師就講香蕉...佢就跟住講...然後拎隻蛋問佢,佢就答: egg!!! 之後仲有一樣..但係我唔記得左係咩lu...跟住放o個3樣野o係枱面,然後叫天朗拎條香蕉俾佢,天朗都做到!! 跟住老師話佢叻,送左粒糖俾佢,老師叫佢講多謝! 佢唔出聲,咁我笑佢講thank you啦...點知佢話thank you mammy...haha..真係俾佢笑死!!送左粒糖不得止,老師仲拎左架車仔出黎,問佢係咩? 佢就答的士..其實係架私家車...原來架車都係送俾佢架喎...(嘩....咁大手筆o既...1蚊報名費都唔使喎...只係俾左4個回郵信封,就換左架車仔番屋企..哈哈哈!!)

然後,老師就叫佢將架車仔同粒糖放入個紙袋,跟住走得啦!! 前後唔使5分鐘...in 完!!哈哈...跟住天朗就自己拎住個紙袋番屋企啦....沿途我話幫佢拎,佢都唔肯,要自己拎...好攪笑!! 番到屋企,第一件事,就係拎左粒糖出黎食....然後拎埋架車出黎玩...哈哈!!

呢間都係一樣,11月頭會收到信,睇下收唔收!!