天朗第3次面試+K1面試結果+交留位費

31.10.2009

呢一日,係天朗第3次面試的日子, 呢日面試之後,忙著去新加坡旅行的事,所以都冇時間寫番...

今日係星期六,所以爸爸放短週,可以同我地一齊去!

今次係小組interview, 由媽媽負責陪天朗,入到去,6-7個小朋友圍著圈坐,而家長坐在小朋友後面,
首先,老師拎個布偶公仔同佢地打招呼,傾下計....天朗開頭都唔肯坐定定,跟住見其他小朋友都有坐,佢先乖乖坐低,不過,都有一個小朋友(我估佢可能同天朗差唔多大,應該都係細仔!)做左樹熊,死跟住媽媽,唔肯自己坐!!

跟住老師拎左個pizza(當然係假的啦!),話請佢地食,叫佢地聞下香唔香,然後每人俾左一件佢地! 期間,都問左d問題,天朗當然係冇答/唔識答啦....呢個時候,真係好明顯睇到大仔同細仔的分別呢!!差幾個月都始終係幾個月呀!!

之後,分開兩個小組,每組有兩個老師輪流同佢地睇下書,玩下玩具...老師拎住本書,想同天朗一齊睇,問佢書入面有咩? 點知佢顧住望隔離個小朋友玩玩具..冇理個老師!! 好彩後來老師問佢其他野,佢都有答到一d....整體來說,天朗的表現算ok啦...比較起來,佢當然冇其他小朋友咁叻答問題,但係,起碼佢冇喊,冇痴住媽咪...都算係咁啦!!

interview完之後,出到黎,媽媽同爸爸講....真係完全被比下去呢...唔係我地天朗唔叻...只係...其他小朋友都好叻呢...雖然呢間係我地最心儀的,但係相信希望不大...因為呢間競爭都幾大....六百幾個人爭百幾個位!

interview完之後,再同天朗o係學校玩左一陣先走呀!!

呢間學校環境比較大,又有戶外的地方,係我地最鍾意呢間學校的其中一個地方!!

K1 Interview 結果

其實,我地去新加坡之前,都已經收到之前in過兩間的取錄信(1間收下午,1間係全日)...不過,我地想等埋最後呢間的結果,先決定讀邊間....

就o係新加坡番黎o個晚,打開信箱....最後in的呢間都收左天朗呀...

勁呀...in左3間...3間都收天朗呀!!!

雖然都係下午班,但係我地都係決定俾天朗讀呢間...雖然媽媽覺得上午班比較好...不過,爸爸就話覺得天朗比較適合讀下午班,因為佢遲訓晏起身!!但係,媽媽就擔心佢到小學會好難適應呢!! 不過,而家都冇計啦...因為只收佢下午班...或者睇下有冇機會轉到啦!!

交留位費

尋日(17.11.2009)，媽媽去左交留位費啦...本來,諗住帶埋天朗去o既...不過呢兩日...天氣實在太凍啦,,,所以都係媽媽自己去算啦!! 都有問過轉上午班的事,個書記小姐都話,你可以照寫信來,但係機會好微,因為每年都有好多人想轉!!

Anyway....幼稚園只係人生學習生涯的一個起點....最緊要係天朗讀得開開心心!!
天朗,希望你會鍾意呢間幼稚園啦!!