經過廿幾個鐘的努力，細佬終於都出世啦! 遲d有時間,精神一定會寫番細佬的生產篇,不過唔知幾時,哈哈!但係,一定會寫,因為呢個係我人生第二次的出生入死經歷,生完之後,o係產房我老公講,唔好生第3個啦! 之後,上到病房我同佢講,你爭我兩條命呀!

生完之後,我都好佩服自己,明明上次生完,痛過一次已經有d怕怕,話要諗下先再生...點知,20個月之後的今日,我又會再一次經歷呢個人生最痛!! 不過,我相信呢個決定係冇錯的,因為我相信日朗同天朗一樣,都一定會為我地帶來好多難忘的回憶! 作為父母,可以為天朗找來一個手足情深(我希望)的細佬,相信對佢地兩個黎講,絕對係痛得值得的!

好了....長話短說....睇相啦!!

2 August 2009

因為大房full左,所以,upgrade左去私家病房,但係,生完日朗第二朝,姑娘走黎問我想唔想出院番屋企,我梗係話想啦!! 可能佢見我係生第二胎,有經驗,同埋可能床位緊迫卦?我心諗屋企張床點到好過醫院o個張,同埋番左屋企,有屋企人幫手,點都好d啦!! 姑娘聽完我話想,佢就話因為我未夠48小時,所以要等醫生睇下先...之後,醫生來巡房,

醫生: 你係咪想出院呀?
我: 係呀!
醫生:點呀...掛住大o個個呀?
我:哈..唔係呀!
醫生:點呀...唔想訓醫院呀?
我:係呀!

(話唔掛住天朗就梗係假啦...佢又唔可以黎醫院探我..已經兩日冇見過佢...可以番屋企見到佢...梗係very good啦!!)

跟住,佢睇下我傷口...話冇問題,可以俾我走....之後,姑娘叫我唔好通知屋企人住,話要等兒科醫生睇埋細佬先喎....哈哈...但係之前佢一問我,我已經即刻話左俾老公知可能有得出院,叫佢幫我地拎定衫啦!!

跟住到左12點幾,終於confirm可以出院啦!! 第一時間,打俾老公...叫佢黎接我地啦!