" 鳳凰山之行", 我地終於o係2006年的最後一日,可以行得成啦!!!
今次係我第三次上去,第一次,係好多年前,讀緊中學時跟童軍的同學仔行,o個次上到一半,因為風太大,所以只好在山腰等睇日出.
第二次係2005年,同教會的弟兄姊姊行,可惜因為太大霧+大風,為左安全計,我地行左少少就冇繼續了,只係o係山腳扎營,過左一晚.
到左今次,我地起行的日子,也因為大家事務繁忙+天氣問題,一而再,再而三改日子.
2006年12月31日,晚上11點左右,大家在東涌集合,等左一輪,分配物資,傾左一輪,我地就成班人傻左咁,o係個商場出面大叫 "10,9,8,7,6,5,4,3,2,1 happy new year" Gloria 仲幫我地預備左香檳添呀!!
倒數完,大家又擾攘完一輪,我地一行20人便出發坐巴士到山腳,開始我地的" 鳳凰山之行"!!
可能因為天氣好,今次行得好舒服,雖然有d凍,不過行的時候真係好熱呢!
我地行下,休息下,行下,休息下,大約個零兩個鐘,便去到一個我地打算稍為歇腳的地方,大家便搵個好地方,坐低煲朱古力,薑茶,我地仲o係度玩UNO添呀,不過因為風實在好大,所以玩左一陣,便放棄了!!
歇完腳,我地就o係有d眼訓的狀態下,繼續行上去. 上到接近山頂的地方,已經冇法再行向上行了,因為個山頂已經企滿人了.所以我地就各自搵個有利位置等候日出. 上到去山頂,比之前仲凍,加上臨天光唔知點解特別凍,我同老公已經凍到縮埋一舊.
到左六點幾,個天已經開始有d光, 到左7點度,個天已經幾光下,仲未見到個日出,大家以為今次白行一躺,點知,就o係呢個時候,忽然聽到大家的尖叫聲,原來係個太陽,終於都緩緩咁升上o黎啦!!!好開心呀,終於都睇到啦!!
太陽先生出o黎之後,大家的注意力,相機都不停對住佢.影左一輪相之後,我地便回程了. 大家成日都話"上山容易,落山難", 呢句說話係冇錯架. 哈哈!!
落山之後,大家食過早餐便坐車番屋企....大覺訓了...zzz....
沒有留言:
張貼留言