生產篇~ 人生最"痛"

生產篇~ 人生最"痛"

(可能會令大家覺得"生仔"好驚嚇,如果唔想睇,咁就唔好啦,唔想嚇親大家呢!!! )

11月12日
今日,我終於體會人家所說的生仔10級痛了! 但係,我可以講...絕對唔止10級啦...係極級痛呢!! 原來,要做人阿媽,真係要付出好大代價架!!!

11月12日 05:30 訓訓下覺,覺得個肚有d痛,起身去完廁所,冇見紅,冇穿水,諗住繼續訓番啦...點知,番上床之後,覺得d痛有d頻密,好似10-15分鐘痛一痛咁,於是嘗試用老公做的"陣痛表"記低痛的時間! 諗住睇定d先,所以冇嘈醒老公,但係痛左幾下,我覺得似似地啦,就話俾老公知...佢立即醒晒...哈哈...

                                                                                      其實仲差1日先40週呢!

 

          bb...你好快就要出黎啦,係咪呢??

  

 

07:00 影埋最後幾張大肚相

07:15 落樓下食埋早餐

08:35 到達醫院+辦妥入院手續,姑娘話我子宮1度都未開,慢慢等下先啦!!

...然後便開始痛苦的等待...

11:00 已經開始5分鐘痛一次,同埋痛耐左,但我知道自己冇咁快,所以都唔敢亂叫姑娘.

12:45 食飽午餐 (咁大個女,從來未試過食哂咁大碗飯,因為食完呢餐,唔知幾點先有野食!),姑娘幫我check 開左2度...繼續等,繼續痛...

15:00 姑娘再幫我check, 開左3度,姑娘問我落唔落產房,話落去幫我穿水,咁樣可以快d..我話好啦! 其實,我覺得佢係想快d推我落去,空番張床出來俾下一個patient,因為o個日個產前房好爆! 不過,o個一刻,已經好痛, 佢話點就點啦...然後打俾在門外的老公,話佢知我準備落產房了

15:15 換左套衫,就俾人推落產房了...老公繼續在產房門外等待...

入到產房,開始覺得有d驚,因為得我自己o係間房度等,同埋愈來愈痛, d姑娘係咁行來行去...開頭,姑娘問我要唔要笑氣,我都話唔使,我心諗咁快就要用笑氣,咁一陣點算,於是繼續忍住痛,後來過左唔知幾耐,我開始頂唔住了,姑娘問我要唔要,我就話要啦!! (話說: 在產前房時,有個姑娘問我知唔知一陣生的時候,有咩止痛方法,我話我知,佢問我有冇
諗住用邊種,我話用笑氣,跟住佢就串我啦,睇你而家痛成咁的樣,唔似一陣用笑氣就得啦喎!!) 唔知係咪因為俾呢個姑娘激發左我的忍耐力,結果我真係只係用左笑氣,冇用其他方法!

不過,唔係因為真係同佢的說話鬥氣,只係到我想打止痛針時,已經太遲了...我同姑娘講話想打針,佢話等佢同我check左,睇下點先,結果,我已經開到8度,佢叫我唔好打,如果唔係會影響bb心跳! 於是,唯有繼續拎住支"救命笑氣"...不停吸..吸..吸..

o係吸笑氣o個幾個鐘,我覺得d時間過得好慢,我記得自己隱約望過幾次鐘,個肚又愈來愈痛,痛到我o係度"典"來"典"去,如果唔係有個圍欄,我諗我已經"典"左落床!!!
個肚愈痛,吸笑氣便愈來愈頻密,

我覺得笑氣簡直係一個偉大的發明,因為佢可以令你暫時(雖然真係好短暫)忘記你的痛苦,之前已經聽人講過,會吸到個人high high地,原來係真既呢,我一路吸,一路覺得自己好似o係度發緊夢咁..但係,間唔中又會聽到d姑娘講野,或者叫我唔好訓成咁! (大佬,o係o個一刻,我只係知自己就黎痛死,點知自己訓到床欄邊呢,於是好努力移番去床中間)o係呢幾個鐘頭入面,我的腦海不停浮現左好多似曾相識的畫面,好似自己曾經發夢見過咁...然後,我仲覺得自己好似上左天堂咁,o係個心入面背主禱文...我們在天上的父,願你......

直到7點幾,姑娘再幫我check,話我可以開始準備生了,我同佢講我老公o係出面等緊,我擺好個姿勢,之後姑娘幫我放小便同穿羊水..然後,都唔知幾時,老公入到黎,企o係我隔離,不停為我打氣,坦白講,o個一刻,我簡直痛到想死,覺得佢把聲音好煩(老公,唔好嬲哦! ),我真係好想走,唔想生啦...不停問自己點解要咁痛苦呢??? 可惜,已經冇得走啦...

~19:30 開始真係生啦,不停聽到姑娘講: 痾啦,痾啦,出力痾啦!

我都好想自己有力呀...對腳撐開左,已經唔係好用到力,或者係我唔識用力...

原來,睇電視o個d係呃人架,我以為對手可以死命捉住我老公,原來我係要將對手放o係大脾下面,幫自己出力架!!

如是者,姑娘講左好多次痾啦,痾啦!! 佢地叫我一痛就痾,腳向外用力,手向自己拉,個 pat pat 要向下用力,個頭要向前望,我全程都合埋眼的,太攰啦..冇晒力...
我每一次都好努力咁痾,不過開頭唔係好識用力,所以都係唔成功,其中一個助產士就同我講,你再o係咁唔得架,bb心跳已經跌緊啦,俾佢咁樣嚇一嚇,仲唔即刻再努力d咩..然後另一個姑娘好好人,好有耐心咁教我用力...結果經過幾番努力...

20:06 聽到佢地話個頭出左黎啦..hold住(之後,聽老公講番原來係條臍帶在bb頸上,所以助產士幫佢放開,然後再叫我用力..就係咁...bb便出世了..冇幾耐..便聽到bb哇哇哇的喊聲了..

o係o個一刻,簡直係虛脫呀...然後助產士便將bb抱黎我前面,問我係男仔定女仔..我話係男仔,然後佢地就帶bb去沖乾淨!

過左一陣,姑娘話bb重3.485kg(真係好難想像自己生左個7磅6的b出黎呀!),之後將bb放o係我隔離的保溫箱,見到佢係咁o係度腳young young...o個種感覺真係唔識講!

又過左一陣,姑娘就叫老公番出去等,話我要o係呢度休息大約個幾鐘,之後就會上產後房!!

然後有個醫生走黎幫我縫針...佢雖然打左麻醉藥,但係我好似都隱約feel到佢o係度縫來縫去咁o既!! 之後,又等左好耐,個傷口好似開始痛了..我諗係d麻醉藥力過了..

之後,有個姑娘抱左bb走先,我就繼續等人黎推我上去後房!

出到去,見到o係出面等我的阿媽,阿爸,阿妹,姨媽,老公,奶奶...一見到我阿媽...我的眼淚便不其然湧出來了...真係唔明,點解呢D痛,我阿媽可以頂3次呢..

本來,我諗住要生兩個架嘛...經過呢一痛,我諗我要好認真咁考慮下呢!!!