bb同媽媽打招呼了

因為怕bb的情況還是不太穩定,所以今日又去左睇醫生.

經過上次忍尿忍到爆的經驗,(因為上次飲定好多水去,但去到之後又等左好耐先到我睇,又唔可以去廁所!)今日,我諗住去到睇下情況先再飲水,點知,去到竟然唔使點等就有得睇,結果入到去睇,咩都照唔到,因為俾d腸遮住晒,醫生話:你唔夠急,要飲多d水先! 結果我出番去等,狂灌左litre幾兩litre水,飲到我想嘔!!!

然後再等左好耐,先去到好急好急的情況,咁先可以清楚照到出黎.姑娘話12週前都係要咁先會照得清楚! oh...我下次又要飲定多d水了!不過姑娘好好,佢話下次幫我book係第一個睇,咁我就唔使等得咁痛苦了!!

實在太好了,bb已經7週了,今日照的時候,我仲好擔心佢唔知會唔會有問題,唔知會唔會唔曉大呢?點知....醫生竟然話睇到bb有心跳了!! 我開頭都唔係睇得好清楚,但經過醫生指示,我真係見到呢!!o係個screen度清楚見到BB係動下動下咁,我o個一刻,感到好興奮.好奇妙呢!!!

睇完醫生,第一時間打俾老公,話佢知見到bb心跳,點知佢第一個反應係: 咦,好驚呀! 好難想像粒米會有心跳呢!! 估唔到bb今日送左份咁"驚"喜的生日禮物俾爸爸呢!!

bb:爸爸,你唔可以咁快就驚架喎!! 我帶來的驚喜,陸續有來喎!! 今日送住呢個俾你做生日禮物先啦!!