ManFish MaMa: 9月 2007

2007年9月28日星期五

妊娠紋

bb,

早幾日,媽媽終於都發覺自己肚中間,有幾條可惡的妊娠紋出現了!!

於是,我立即打俾爸爸,話俾佢知,因為我每晚都會叫佢幫我望下有冇紋出現嘛,因為我個肚仔愈來愈大,有d位置我自己已經望唔到嘛! 但係,佢永遠都話冇! o個日,無意中,o係屋企坐o係度照鏡,俾我發覺左佢地的存在呀!!! oh my god....雖然我一直相信妊娠紋呢樣野唔會因為你好勤力咁搽gel就唔出現!! 仲以為自己咁叻,真係一條紋都冇!

不過,好彩,都唔算係有好多!! 最激死係,老公番到黎,我指俾佢睇,佢話:哦,原來呢d係妊娠紋,我以為係你自己抓損咋,我之前都有問你係咪自己抓損架,你話冇呀嘛! 我點知o個d係妊娠紋喎,我又未見過!! 你話係咪俾爸爸吹脹呢!!

之前,有同事話,當發覺自己有妊娠紋o個一刻,好唔開心,仲喊左出黎,好彩,媽媽都算平靜,只不過有點愕然!!

不過,我都好快接受左啦,可能因為佢係o係一個我唔係咁容易見到的位啦,哈哈!! 我有個同事,佢個肚勁大,當然佢d妊娠紋都係勁多,但佢好睇得開,仲話呢d係"signs of love" 添!!

咁又係呀,呢個又係媽媽偉大的其中一個表記!! 為了生bb你,都唔會去計較咁多啦!!!

見了。幾分鐘

27.9.2007

今日,結果終於都係去左搵Eric,雖然等左大半個鐘,都只係見到佢幾分鐘,不過,冇辦法啦,因為佢要趕住北上,返大陸做簽唱會!

傻傻的Eric,一見我,就話:咦,你仲未生咩? 我話:未呀,11月呀嘛! 跟住佢又傻傻的說:哦,11月呀,然後拍拍我膊頭,好好保重呀!

很喜歡看到你這麼"真"的笑容呢!!

講講下,已經行到去門口,要上車了,我就把握時間幫佢影左兩張相,然後問佢,可唔可以同佢影啦,因為機會已經唔多啦嘛...加上今日人少少,應該ok卦,哈哈,Eric好好呀,都冇拒絕我呢個大肚婆,快快趣同佢影完相,佢就要上車走了! 呢幾日,佢頻頻撲撲咁中港穿梭,真係替佢感到辛苦呢,希望佢可以有時間好好休息一下啦!!

唔知仲有冇下一次呢...o係我生bb之前...

每次去之前,我都要得到approval,(其實有時係我自己堅持要去,老公都冇我符,哈哈!!) 但係,我都唔想,我出左去,令佢唔開心! 所以,我一定會話俾佢知! 我會同佢講,我冇咩機會架啦,遲d想去都去唔到架啦! 佢就會話我,你次次都係咁講架啦!!

咁係呀嘛,趁我仲行得走得,健步如飛,俾我做d令自己開心的事啦,我一定會好小心架嘛!!

BB的手信

bb,

你又有禮物收了,Bear 契媽媽去完美國旅行番o黎,帶番o黎的手信...全部都係bb你架...不過,媽媽都好鍾意呀,因為全部都係winnie the pooh嘛,嘻嘻!!

件衫仔好靚呀,個阿pooh好cute呀!! 仲有classic pooh的口水肩,

同埋一個好得意的杯杯呀,唔知你幾時先識自己拎o黎用呢,嘻嘻!!

Bear 契媽媽,我代bb多謝你呀!!!

中秋。好圓

25.9.2007

今年中秋節,一如以往,番左屋企bbq,今年唔同的係,人少左,因為大家好多都大個仔,大個女啦,有自己的節目了!! 不過,我依然係選擇左留o係屋企,因為...雖然我都係大個女啦,不過又係大住個肚,哈哈,所以,都係唔好四圍走啦,留o係屋企燒下野食,一家人開開心心咁過!

今日,都幾好呀,原先話可能睇唔到月光光架嘛,不過我地都睇到呀,都幾清楚,幾圓呀!! bb今年o係媽媽肚裡面過,下年就可以同我地一齊賞月啦,嘻嘻!!

相片...遲d加...

2007年9月22日星期六

乖乖在家

今日,本來諗住去見下孫先生啦,因為佢去左美國個幾星期,下個星期又要返大陸做宣傳,唔知幾時先返黎! 但係,結果呢,我都係乖乖留左o係屋企,冇出到去呀! 因為尋晚又抽筋,今朝起身隻腳好痛,另外o個隻腳,腳跟又好痛,所以今日就冇去做小fans,留左o係屋企做乖老婆,乖mama啦!!

最弊呢,我o係屋企唔係好好休息啊,因為我有"執屋"僻好,每當我有時間o係屋企,我就會左執下,右執下,執個不停,因為我鍾意整整齊齊,好乾淨的感覺,咁先似屋企架嘛!

所以今日,就一次過將平時隻眼開,隻眼閉的混亂變番整齊啦,每次執完都好開心,好有滿足感架,不過附加"好攰"!! 哈哈!!

仲有唔夠一個月,我的產假就黎啦,好期待呀!! 真係唔想番工呀,因為日日咁早要爬起身,真係好攰呀,加上,而家夜晚多數都訓得唔好,所以朝早都會好攰,冇精神!!

冇辦法啦,懷孕蜜月期已經過去啦,進入倒數2個月了,係會開始辛苦d架啦!! 唯有盡量努力去適應啦!!

--->

今日,將尋日洗的衫仔摺好晒啦!!

仲有已經另外執好左俾bb出院著的衫仔啦,yeah!

2007年9月21日星期五

洗衫~手洗篇

bb,

今日終於買左你的沖涼盆啦,亦難得趁住爸爸今日o係屋企,我地就一齊洗衫啦!! 今日主要都係洗新買的衫仔同毛巾啦!!

紗巾大晒冷!!

靚靚阿pooh毛巾仔 (媽媽今年的生日禮物from Gloria姐姐)

仲有爸爸媽媽同埋親戚新買俾你的衫仔呀!

洗完衫,休息左一陣,我地就落左樓下游水水了! 因為今年買的飛,只係用埋下個星期,所以要用埋佢啦!! 不過,估唔到今日d 水好凍呀....爸爸媽媽好"浪漫"咁o係池邊踢左好耐水,談左好耐心(因為當時成個池得我地兩個傻瓜!哈哈!!) 都冇落水呀!! 掙扎左好耐,後來都有d人黎游水了! 媽媽終於落左水啦,因為我真係好想游呀,同埋我覺得ok呀,唔係真係好凍呀,而爸爸就怕會好凍呀,因為佢未好番晒嘛,怕會冷親,所以佢只係o係池邊睇住我地游啦!! 游左大半個鐘,就返屋企lu!!

32週~健康院檢查

bb,

媽媽今日好開心呀,因為今日係爸爸第一次陪我地去健康院做檢查呀!!! 因為爸爸仲未病好呀,所以今日請左病假,順便陪我地去檢查,希望爸爸快d好番啦!!

難得一齊唔使返工,所以我地訓到好遲先起身呀,然後食完lunch,見未夠鐘,就去行左一陣,終於都買左個沖涼盆俾你lu....其實咁快買,係為左你的"洗衫project"呢...

放左個盆番屋企,我地就去左健康院排隊等拎籌啦,好彩我地今日都有早d去到,因為真係好多人呢!! 拎左籌,入到去等緊的時候,見到爸爸同一個人打招呼,咁我就望下啦,然後爸爸問我,佢係邊個,我話你唔認得,又同佢打招呼,真係攪笑..原來係曹爸爸的媽咪呀,於是我地過去同佢打招呼同埋睇下bb先,佢今日帶11日大的曹bb黎健康院做檢查呀,仲有曹太太呀! 曹bb好得意呀,訓緊覺覺豬,不過佢表情多多,兩隻手仔係咁"郁",好可愛呀!! bb你將來會唔會同佢做好朋友仔呢?

等左一陣,磅完重,量完血壓,等見姑娘.....今次終於都冇話我過重了,媽媽今日有60.1kg,比起2個星期前,只係重左0.6kg,哈哈,所以姑娘冇話我啦,同埋今日個姑娘好好人呀...因為媽媽入左房之後,爸爸唔知行左去邊,姑娘仲幫我嗌番佢入黎,難得佢今日陪埋媽媽一齊黎嘛...梗係想俾佢聽下你的心跳聲啦,因為佢未聽過架嘛! 然後我問佢問題,佢又好詳細咁答我喎,原來我地平時隔著肚仔"聽"到你的一下一下的"聲",唔係心跳,係bb你打"C egg "呀..哈哈...爸爸媽媽真係好傻呢!!

姑娘話你size 正常,佢都摸到你頭仔係向下啦,不過佢話係側側地咁,未完全對到正,大約36週就會對到正啦!

姑娘又提醒媽媽要做功課啦~~數胎動...所以bb你要乖乖合作呀,要"郁"多d啦...等媽媽"交足數"啦..嘻嘻!!!

2007年9月20日星期四

愈夜愈精彩

bb,

尋晚,臨訓前,媽媽好似平時咁,不停咁"初"下個肚仔,等媽媽感覺你"郁"下,點知,唔攪你都冇野,一攪你,你就好興奮咁,"郁"個不停呀,於是媽媽立即捉住爸爸的手,放在媽媽的肚仔上,讓他也感覺一下你的厲害呀!! bb你開始不時咁o係媽媽肚裡面鑽o黎鑽去,有時仲明顯到可以見到添!!

bb你仲特別喜歡玩野,次次你"郁",我即刻叫爸爸摸,跟住你就唔"郁"啦!!

真係俾你吹脹...

不過,有時你"郁或者踢,媽媽都未識得分,到底係你的手仔定腳仔呢?!

就係咁...爸爸摸住你,摸摸下,就訓著左lu....而過左一陣,媽媽都訓埋lu....得你自己o係度繼續"碌"....

2007年9月19日星期三

我討厭。星期三

今日,帶著疲累的身軀上班去,再拖著疲累的身軀回家來!

大概係呢兩日太過努力工作,用電腦的時間太長了,所以令到手指有d痛!! 同事聽到我咁講,即刻叫我要停,要休息下,唔可以再做啦,又幫我換左個optical 碌碌mouse (有得scroll的),我覺得換左,係好d既,at least d 手指唔使咁用力嘛! 我而家做緊既野係比較煩同花時間的,所以我寧可快快趣趣攪掂佢,唔想拖長黎做!! 其實,而家做的就係將d report的data入電腦,話說之前已經做好晒架啦,但係因為IT dept的人一個唔該,一個delete制,攪到我又要從頭入過!!!