結構性超聲波

5.7.2007

今日好開心呢,因為又係去"睇"bb的日子了,今日仲有兩個人陪我去醫院添,就係我老公同媽咪啦!! 

今日係去醫院照結構性超聲波,即係會超得比較詳細,睇下bb的面部,手腳同各個器官! 唔知係咪阿姑娘趕住食飯呢,因為我係朝早睇的最後一個,所以佢超得好快,唔算講得好詳盡,可能其實係我地自己"期望"太高卦!!

今日照的時候,姑娘話bb坐左o係度...好攪笑...見到佢的手腳同面部,不過,我其實唔係好睇得清楚眼,鼻,口,但老公話睇到個鼻!! 睇得最清楚的係bb個心臟同條尾龍骨,因為唔知點解個姑娘不停咁俾個心我地睇,睇到佢閃下閃下咁..!! 很感恩,bb的各個器官都成長得很正常,而bb的size都係正常,(雖然我個肚仔,仲好似好細咁)....bb已經21週有多了..

睇完之後,食完lunch,媽咪就自己走先,因為我同老公book左要番去醫院,聽產前講座! 姑娘問邊個feel到bb動,我冇舉手,因為我真係未feel到嘛...佢問我幾週?我話21週! 然後佢就用好疑惑的眼神望住我...車...呢d野都係因人而異既姐...不過我而家晚晚都有同bb講架...叫佢要快d俾我感覺到佢動....嘻嘻...同埋我今日先知,如果我要選擇餵母乳,係要一路繼續戒口架喎.....Oh.....

 

聽到4點幾先走,然後我地就去左探望徐宅一家!

徐仔又大個仔左啦 比起兩個月前上去探佢地o個次,佢今次多左好多野講,正確d黎講,你講咩佢都會跟住講,同埋佢又會用佢的bb話去表達佢要講的野,好得意!!
開頭真係聽唔明佢想講咩,要搵熙熙家姐幫我地翻譯,後來,先開始聽得明少少. 熙熙都大個女左好多,聽佢講野,有時你都會覺得,點解一個幼稚園小妹妹講野咁"大人"既!

 係徐仔用我個電話自己影架...佢隻腳仔

之後我地仲"痴"埋餐,然後帶住幾3大袋"禮物"走添呀..有"咩"帶,被仔,帽仔,好多衫仔...本來有4袋架,不過,老公得一對手,拎唔晒...所以o個袋,唯有等下次拎!!