36週~健康院檢查

bb,

今日係媽媽放假的日子啦,不過都冇得訓晏d啦,因為要一早起身去健康院做檢查,因為聽日係紅日,所以要提前今日啦...

我預計會有好多人啦...所以都預早左時間去排隊啦!! 好彩,都拎到十幾號籌,都算好快就有得睇啦....今日係見醫生,不過都唔好expect 會有d咩啦...都係做o個d 野...只不過換左係醫生做,唔係姑娘做之嘛!!

嘩...個醫生按到媽媽個肚好痛耶...唔知你有咩感覺呢?  佢按下,摸下,度下我子宮size,話一切都正常,佢話bb你個頭已經落左少少去媽媽的盤骨啦! 我問佢,算唔算低,佢就話唔算! 另外,佢話我比上次重多左啦,應該係d水喎.....佢都冇特別講d咩,冇話我!

然後,就出番去等,儲夠幾個都係36週的媽媽,就有個護士長同我地講解入院需知...到時要點,要帶d咩.....等等....之後,我仲聽埋個talk先走,因為之前時間唔夾,所以冇聽到! 都ok啦...聽多少少,知多d咁啦...不過其實都只係睇video啦...哈哈!

然後,去食左d 野,o係屋企樓下行左陣,就番左屋企lu....然後忍唔住執左一陣屋...仲俾善怡串我...話我一得閒就要執屋,自己搵野黎做!